प्रभाग क्रमांक ११ : पराभवातही विजयाची छाप; पराभूत गाजला ! गडचिरोलीत अनिल तिडकेंचीच चर्चा, राजकारणात नवे पर्व!
23/12/2025
गडचिरोली:प्रभाग क्रमांक ११ ची निवडणूक ही केवळ एक निवडणूक नव्हती, तर ती राजकीय ताकदीची आणि नेतृत्वाच्या धैर्याची खरी परीक्षा होती. या निवडणुकीत सर्वसामान्य जनता तसेच राजकीय नेत्यांची संपूर्ण ताकद पणाला लागली होती. निकाल जरी कोणाच्याही बाजूने लागला असला, तरी जिंकणाऱ्यांपेक्षा पराभूत उमेदवाराचीच अधिक चर्चा होत आहे, हेच या निवडणुकीचे खरे वैशिष्ट्य ठरले आहे.
प्रभागातील प्रबळ नेते लिलाधर भरडकर यांचा गड समजल्या जाणाऱ्या ठिकाणी, प्रतिकूल परिस्थितीतही धाडसाने मैदानात उतरून लढा देणारे अनिल तिडके हे एकमेव उमेदवार ठरले. स्वतः त्या ठिकाणचे नसतानाही तेथे जाऊन निवडणूक लढवणे, ही बाब केवळ राजकीय नाही तर धैर्य, आत्मविश्वास आणि जनतेशी नातं जोडणाऱ्या नेतृत्वाची साक्ष देणारी ठरली.
पराभव झाला असला, तरी निवडणुकीच्या आधी, निवडणुकीनंतर आणि आजही प्रभागात तसेच संपूर्ण गडचिरोली शहरात चर्चा एका नावाचीच सुरू आहे — अनिल तिडके. ही चर्चा म्हणजे जनतेच्या मनात निर्माण झालेल्या विश्वासाची स्पष्ट पावती आहे.
“जनतेवरील माझा विश्वास आणि सेवाभाव कधीही कमी होणार नाही,” असा ठाम विश्वास व्यक्त करत अनिल तिडके यांनी या निवडणुकीकडे अनुभव आणि शिकवण म्हणून पाहिले आहे. हा पराभव नसून, तो भविष्यातील मोठ्या विजयाचा पाया आहे, असेच चित्र आज राजकीय वर्तुळात दिसून येत आहे.
पुढील काळात अधिक जोमात, अधिक ताकदीने आणि नव्या उमेदीने अनिल तिडके परत येणार — ही केवळ घोषणा नाही, तर जनतेला दिलेले ठाम वचन आहे.