गडचिरोलीवर शोककळा : ज्येष्ठ समाजसेवक माजी नगराध्यक्ष सुरेश सावकार पोरेड्डीवार यांचे सुपुत्र अमेय पोरेड्डीवार यांचे आकस्मिक निधन
वयाच्या अवघ्या ३९ व्या वर्षी काळाचा घाला; शहरात हळहळ, विविध स्तरांतून श्रद्धांजली
गडचिरोली, दि. १६ जून : गडचिरोली शहरातील प्रतिष्ठित सावकार पोरेड्डीवार कुटुंबावर दुःखाचा डोंगर कोसळला असून गडचिरोली नगरपालिकेचे पहिले नगराध्यक्ष तथा ज्येष्ठ समाजसेवक सुरेश सावकार पोरेड्डीवार यांचे सुपुत्र अमेय पोरेड्डीवार (वय ३९) यांचे आज सकाळी अचानक निधन झाले. त्यांच्या अकाली निधनाच्या वृत्ताने संपूर्ण शहरात शोककळा पसरली असून विविध क्षेत्रांतील मान्यवर, मित्रपरिवार व नागरिकांकडून हळहळ व्यक्त केली जात आहे.
मिळालेल्या माहितीनुसार, आज सकाळी सुमारे साडेनऊ वाजताच्या सुमारास अमेय पोरेड्डीवार हे आपल्या राहत्या घरी नाश्ता करत असताना त्यांना अचानक छातीत तीव्र वेदना जाणवू लागल्या. प्रकृती गंभीर झाल्याचे लक्षात येताच कुटुंबीयांनी त्यांना तातडीने जिल्हा सामान्य रुग्णालय, गडचिरोली येथे दाखल केले. मात्र, वैद्यकीय अधिकाऱ्यांनी तपासणीनंतर त्यांचा मृत्यू झाल्याचे घोषित केले. या अनपेक्षित घटनेमुळे कुटुंबीय, नातेवाईक आणि मित्रपरिवारावर दुःखाचा मोठा आघात झाला आहे.
अमेय पोरेड्डीवार हे अत्यंत मनमिळावू, प्रेमळ आणि सर्वांशी आत्मीयतेने वागणारे व्यक्तिमत्त्व म्हणून परिचित होते. सामाजिक, व्यावसायिक आणि कौटुंबिक क्षेत्रात त्यांनी अनेकांशी जिव्हाळ्याचे संबंध जपले होते. त्यांच्या नम्र, सहकार्यशील आणि सुसंस्कृत स्वभावामुळे समाजातील सर्व स्तरांतील नागरिकांमध्ये त्यांच्याविषयी विशेष आदरभाव होता.
त्यांच्या निधनाची बातमी शहरात पसरताच अनेक नागरिकांनी सावकार पोरेड्डीवार कुटुंबीयांची भेट घेऊन सांत्वन व्यक्त केले. सामाजिक, राजकीय, शैक्षणिक तसेच व्यावसायिक क्षेत्रातील मान्यवरांकडूनही भावपूर्ण श्रद्धांजली अर्पण करण्यात येत आहे.
अमेय पोरेड्डीवार यांच्या पश्चात पत्नी, आई-वडील तसेच मोठा आप्तपरिवार आहे. त्यांच्या अकाली जाण्यामुळे सावकार पोरेड्डीवार कुटुंबावर मोठे दुःख कोसळले असून या दुःखद प्रसंगात संपूर्ण गडचिरोली शहर त्यांच्या पाठीशी उभे असल्याची भावना व्यक्त केली जात आहे.
अंत्यसंस्कार उद्या
स्वर्गीय अमेय पोरेड्डीवार यांच्यावर उद्या, दि. १७ जून २०२६ रोजी गडचिरोली येथील कठाणी नदी तीरावरील स्मशानभूमीत अंत्यसंस्कार करण्यात येणार असल्याची माहिती कुटुंबीयांनी दिली आहे.
भावपूर्ण श्रद्धांजली
“ईश्वर त्यांच्या आत्म्यास चिरशांती देवो आणि सावकार पोरेड्डीवार कुटुंबीयांना हे दुःख सहन करण्याची शक्ती प्रदान करो,” अशा भावना सर्व स्तरांतून व्यक्त होत आहेत.