*_चामोर्शीत दसरा उत्साहात साजरा;या शुभमुहूर्तावर शुद्ध पिण्याच्या पाण्याच्या यंत्राचे लोकार्पण मा.खा. डॉ. अशोकजी नेते यांच्या हस्ते संपन्न_*
चामोर्शी (दि. २ ऑक्टोबर २०२५):
चामोर्शी शहरात दसरा विजयादशमीचा उत्सव यंदा सामाजिक उपक्रम आणि धार्मिक सोहळ्यांच्या सुंदर संगमातून अत्यंत उत्साहात साजरा करण्यात आला.
या निमित्ताने गोंड मोहल्ला, चामोर्शी येथे माजी खासदार तथा राष्ट्रीय महामंत्री भाजपा अनुसूचित जनजाती मोर्चाचे डॉ. अशोकजी नेते यांच्या स्थानिक विकास निधीतून उभारण्यात आलेल्या शुद्ध पिण्याच्या पाण्याच्या यंत्राचे लोकार्पण त्यांच्या शुभहस्ते पार पडले.
*नागरिकांसाठी अत्याधुनिक सुविधा*
पिण्याच्या पाण्याची दीर्घकालीन अडचण लक्षात घेऊन उभारण्यात आलेले हे अत्याधुनिक “पाणी एटीएम” द्वारे नागरिकांना पूर्णपणे नि:शुल्क शुद्ध पाणी उपलब्ध करून देणार आहे. नगरसेवक आशिषभाऊ पिपरे यांच्या पुढाकारातून उभारलेल्या या उपक्रमामुळे नागरिकांमध्ये समाधानाचे आणि आनंदाचे वातावरण निर्माण झाले आहे.
या दसरा च्या शुभ प्रसंगी आपले मनोगत व्यक्त करताना डॉ. नेते म्हणाले की, “चामोर्शीतील प्रत्येक वार्डाचा विकास ही माझी प्राथमिक जबाबदारी आहे. नगरसेवक आशिष पिपरे यांच्या पुढाकारातून या भागात सभागृह, व्यायाम साहित्य, स्वच्छतागृह, क्रीडांगण आणि आता शुद्ध पिण्याच्या पाण्याचे यंत्र अशा अनेक विकासकामांची यशस्वी अंमलबजावणी झाली आहे. यापुढेही नागरिकांच्या गरजांना प्राधान्य देत विकासाची गती कायम ठेवली जाईल.”असे व्यक्त मा.खा.डॉ. नेते यांनी केले.
*दसरा उत्सवात शोभायात्रा व रावण दहन*
दसरा निमित्त आयोजित भव्य शोभायात्रा ही या उत्सवाचे प्रमुख आकर्षण ठरली. भगवान श्रीराम, लक्ष्मण, सीता व हनुमान यांच्या देखण्या प्रतिमा या शोभायात्रेत साकारण्यात आल्या. डीजे व बॅण्डच्या गजरात “जय श्रीराम” च्या घोषणांनी परिसर दुमदुमून गेला.
यानंतर पटांगणात पारंपरिक रितीने रावण दहनाचा सोहळा उत्साहात पार पडला. आकाशात रंगीबेरंगी फटाक्यांची आतषबाजी झळाळली आणि जयघोषांनी संपूर्ण परिसर गगनभेदी झाला.
या उत्सवाच्या सोहळ्यास माजी खासदार तथा भाजपा अनुसूचित जनजाती मोर्चाचे राष्ट्रीय महामंत्री डॉ. अशोकजी नेते प्रमुख पाहुणे म्हणून उपस्थित होते. त्यांच्यासह भाजपा जिल्हा महामंत्री प्रकाशजी गेडाम, नगरपंचायत चामोर्शी सभापती सोनाली आशिष पिपरे, नगरसेवक आशिष पिपरे, बंडुभाऊ नैताम यांच्यासह शेकडो नागरिक मोठ्या संख्येने सहभागी होऊन उत्सव अविस्मरणीय केला.