*शेतकऱ्यांसाठी कृषि विभागाच्या विविध योजनांची दिवाळीपूर्व भेट*

*शेतकऱ्यांसाठी कृषि विभागाच्या विविध योजनांची दिवाळीपूर्व भेट*

गडचिरोली, दि. १७ ऑक्टोबर २०२५: जिल्ह्यातील शेतकऱ्यांसाठी कृषि विभागाने विविध नाविन्यपूर्ण व अनुदानाधारित योजना राबविण्याची तयारी केली असून, या योजना शेतकऱ्यांसाठी दिवाळीपूर्व “कृषि समृद्धीची भेट” ठरणार असल्याचे जिल्हा अधीक्षक कृषी अधिकारी प्रीती हिरळकर यांनी सांगितले आहे.

*प्रमुख उपक्रम*

सौर कुंपण, सामुदायिक शेततळे, शिंगाडा लागवड, चारोळी-मोहफूल प्रक्रिया प्रकल्प, मोती उत्पादन व आळंबी शेती यांसारखे उपक्रम 90 – 95 टक्के अनुदानावर राबविले जाणार आहेत.

*कृषि समृद्धी योजना २०२५-२६*

या योजनेअंतर्गत शाश्वत शेती, उत्पादनवाढ आणि भांडवली गुंतवणुकीस चालना देण्यात येणार आहे. सूक्ष्म सिंचन, सेंद्रिय शेती, डिजीटल शेती, प्रक्रिया व निर्यात या क्षेत्रांना प्राधान्य दिले असून, महिला, अल्पभूधारक, अनुसूचित जाती-जमाती व दिव्यांग शेतकऱ्यांना विशेष प्राधान्य दिले जाणार आहे.

लाभार्थी निवड “प्रथम येणाऱ्यास प्रथम प्राधान्य (FCFS)” या तत्त्वावर होईल व सर्व अर्ज https://mahadbt.maharashtra.gov.in/farmer या संकेतस्थळावर ऑनलाईन सादर करता येतील.

*फळोत्पादन विकास अभियान*

एकात्मिक फळोत्पादन विकास अभियानांतर्गत फळबाग पुनरुज्जीवन, मधुमक्षिका पालन, शेडनेट/हरितगृह, प्लास्टिक मल्चिंग, पॅक हाऊस, शीतगृह, ट्रॅक्टर व पॉवर टिलर खरेदी अशा घटकांसाठी शेतकऱ्यांकडून अर्ज मागविण्यात आले आहेत.

शेतकऱ्यांनी सर्व योजनांचा लाभ घेण्यासाठी अर्ज करण्याचे आवाहन कृषी विभागाने केले आहे.