सावंगी ग्रामसभेने तयार केला विकास आराखडा
देसाईगंज : अनुसूचित जमाती व इतर पारंपरिक वन निवासी वन हक्क मान्यता अधिनियम २००६, नियम २००८ तसेच सुधारित नियम २०१२ अंतर्गत ग्रामसभा सावंगी यांना सन २०११ मध्ये २५७.६८ हेक्टर सामूहिक वनहक्क क्षेत्र प्राप्त झाले आहे. ग्रामसभेच्या माध्यमातून या सामूहिक वनहक्क क्षेत्राच्या विकासाच्या दृष्टीने प्राप्त क्षेत्राचा वन व्यवस्थापन आराखडा तयार करण्यात आला आहे.
आज दिनांक २५ मार्च २०२६ रोजी देसाईगंज येथील तहसीलदार यांच्या उपस्थितीत सदर आराखडा मंजुरीसाठी सादर करण्यात आला. वन व्यवस्थापन आराखडा तसेच अतिरिक्त नियोजन आराखड्यात मंजूर करण्यात आलेली कामे प्रत्यक्ष क्षेत्रात राबविण्यासाठी ३० नोव्हेंबर २०२१ च्या शासन निर्णयानुसार ग्रामसभेला रोहयो (रोजगार हमी योजना) अंमलबजावणी यंत्रणा म्हणून घोषित करण्यात आले आहे. त्या अनुषंगाने सामूहिक वनहक्क क्षेत्रात विविध विकास कामांना सुरुवात करण्यात येणार आहे.
सामूहिक वनहक्क क्षेत्राच्या विकासाबरोबरच गावातील नागरिकांना गावपातळीवर रोजगार उपलब्ध करून देण्यासाठी ग्रामसभा प्रयत्नशील आहे.
सदर उपक्रम वनरक्षक, सृष्टी संस्था आणि एफ.ई.एस. संस्थेच्या सहकार्याने तसेच सामूहिक वन हक्क व्यवस्थापन समितीच्या पुढाकाराने राबविण्यात येत आहे. यावेळी ग्रामसभाध्यक्ष सविता जगदीश उईके, सचिव देवचंद मेश्राम, ग्रामसभा मार्गदर्शक कुणाल गुरनुले (सृष्टी संस्था, येरंडी), पत्रे साहेब महा ग्राम सभा सचिव , बाबुनाथ बेद्रे , महाग्रामसभा प्रतिनिधी , ग्राम सभा सदस्य सौ. त्रिज्या कन्नाके , सौ. रविना उईके ( कोषाध्यक्ष ) श्री मोतीराम उइके, सौ. रेखा कन्नाके, सौ. वर्षा कन्नाके, सौ. शालू उईके, तसेच ईतर पदाधिकारी उपस्थित होते
