🚨 भीषण अपघाताने गडचिरोली हादरले 🚨 तळोधी येथे स्कॉर्पिओ-ट्रॅव्हल्सची समोरासमोर धडक; चार ठार, १२ जखमी

🚨 भीषण अपघाताने गडचिरोली हादरले 🚨

तळोधी येथे स्कॉर्पिओ-ट्रॅव्हल्सची समोरासमोर धडक; चार ठार, १२ जखमी

“जखमींवर तातडीने दर्जेदार उपचार करा” – जिल्हाधिकारी अविश्यांत पंडा यांचे आदेश

गडचिरोली, दि. २९ (जिमाका) – गडचिरोली-चामोर्शी मार्गावरील तळोधी येथे रविवारी सायंकाळी झालेल्या भीषण अपघाताने संपूर्ण परिसर हादरून गेला. स्कॉर्पिओ आणि ट्रॅव्हल्स वाहनाची समोरासमोर जोरदार धडक होऊन चार जणांचा जागीच मृत्यू झाला, तर १२ जण गंभीर जखमी झाले आहेत.

मिळालेल्या माहितीनुसार, कुरुल-रामपूर येथून भाडभीडी (मो.) येथे लग्नसमारंभासाठी निघालेल्या स्कॉर्पिओ (MH 46 P 5392) वाहनाची गडचिरोलीकडून येणाऱ्या प्रवीण टुर्स अँड ट्रॅव्हल्स (MH 15 CK 5005) या वाहनाशी तळोधी येथील नवीन पेट्रोल पंपाजवळ समोरासमोर धडक झाली. धडकेची तीव्रता इतकी होती की स्कॉर्पिओमधील चार जणांचा जागीच मृत्यू झाला.

घटनेची माहिती मिळताच जिल्हाधिकारी अविश्यांत पंडा यांनी तात्काळ गडचिरोली जिल्हा सामान्य रुग्णालयात भेट देऊन जखमींची विचारपूस केली. यावेळी आमदार डॉ. मिलिंद नरोटे, अपर पोलीस अधीक्षक एम. रमेश, श्री. गोकुल तसेच जिल्हा शल्य चिकित्सक डॉ. वर्षा लहाडे उपस्थित होते.

जिल्हाधिकाऱ्यांनी डॉक्टरांना स्पष्ट निर्देश देत उपचारात कोणतीही हलगर्जी होऊ नये, आवश्यक औषधे, मनुष्यबळ आणि यंत्रणा तात्काळ उपलब्ध करून द्यावी, असे सांगितले. तसेच जखमींच्या नातेवाईकांना सर्वतोपरी मदत करण्याचे आदेशही दिले.

अपघातानंतर जखमींना तातडीने तळोधी ग्रामीण रुग्णालयात प्राथमिक उपचार देण्यात आले आणि त्यानंतर पुढील उपचारासाठी गडचिरोली जिल्हा रुग्णालयात हलविण्यात आले.

दरम्यान, या दुर्घटनेमुळे परिसरात हळहळ व्यक्त होत असून मृतांच्या कुटुंबीयांवर शोककळा पसरली आहे.

⚫ मृतांची नावे :

अनिकेत बर्लावार (वय २६, रा. भाडभीडी)

आरोही मोगरकर (वय ८, रा. गट्टेगुडा)

सुमन गव्हारे (वय ६०, रा. कुणघाडा)

विमलाबाई गव्हारे (वय ६०, रा. कुणघाडा)

🚑 जखमींची नावे :

गुरुदेव कुणघाडकर, सुधाकर कुणघाडकर, वेदांत वैरागडे, प्रतिमा मानमुडकर, निखिल दराडे, संजय वैरागडे, कुणाल कन्नाके, रेखा चलाख, अमर चलाख, देवाजी गव्हारे, गुरूदास वासेकर आदी जखमी असून त्यांच्यावर उपचार सुरू आहेत.

👉 प्रशासन सज्ज, मदतीचा हात पुढे

जिल्हाधिकाऱ्यांनी अपघातग्रस्तांच्या कुटुंबीयांना धीर देत प्रशासन त्यांच्या पाठीशी ठामपणे उभे असल्याचा दिलासा दिला आहे.