*नगराध्यक्ष प्रणोती निबोंरकर यांच्या शुभहस्ते गडचिरोली नगर परिषदेत ध्वजारोहण; ७७ वा प्रजासत्ताक दिन उत्साहात व अभिमानाने साजरा!*
दिं.26/01/2026
*गडचिरोली;* भारताच्या संविधानाने दिलेल्या लोकशाही मूल्यांचा गौरव करणारा ७७ वा प्रजासत्ताक दिन गडचिरोली नगर परिषद कार्यालयात अत्यंत उत्साहपूर्ण व देशभक्तीच्या वातावरणात साजरा करण्यात आला. या प्रसंगी *नगराध्यक्ष प्रणोती निबोंरकर यांच्या शुभहस्ते सकाळी ७.४५ वाजता ध्वजारोहण करण्यात आले. ध्वजारोहणावेळी तिरंगा अभिमानाने फडकताना उपस्थित नागरिकांनी भारत माता की जयच्या घोषणा देत परिसर देशभक्तीने दुमदुमून टाकला*.
या कार्यक्रमास मुख्याधिकारी सूर्यकांत पिंदुरकर प्रमुख उपस्थित होते. ध्वजारोहणानंतर नगर परिषद शाळेतील विद्यार्थ्यांनी राष्ट्रगीत सादर केले. विद्यार्थ्यांच्या सुस्वर गायनाने उपस्थितांमध्ये देशप्रेमाची भावना अधिकच प्रबळ झाली. त्यानंतर विद्यार्थ्यांनी सादर केलेल्या देशभक्तीपर गीत व नृत्याविष्काराने कार्यक्रमात रंगत आणली आणि उपस्थितांनी टाळ्यांच्या कडकडाटात त्यांचे कौतुक केले.
या सोहळ्यास विद्यार्थी-विद्यार्थिनी, शिक्षकवर्ग, नगर परिषद कर्मचारी, नगरसेवक व नगरसेविका, सभापती, सामाजिक कार्यकर्ते, पत्रकार, युवक-युवती, महिला, ज्येष्ठ नेते, विविध संघटनांचे कार्यकर्ते तसेच गडचिरोली शहरातील सुजाण नागरिक मोठ्या संख्येने उपस्थित होते. विविध स्तरातील नागरिकांची लक्षणीय उपस्थिती ही लोकशाहीतील एकतेचे दर्शन घडवणारी ठरली.
कार्यक्रमानंतर सर्व उपस्थित नागरिकांसाठी नाश्त्याची व्यवस्था करण्यात आली. यामुळे आपुलकीचे आणि सौहार्दाचे वातावरण निर्माण झाले. यानंतर *नगराध्यक्ष प्रणोती निबोंरकर यांनी उपस्थित नागरिकांशी संवाद साधताना भारतीय संविधानाचे महत्त्व, नागरिकांचे हक्क व कर्तव्ये तसेच लोकशाही टिकवण्यासाठी जनतेचा सक्रिय सहभाग आवश्यक असल्याचे प्रतिपादन केले. शासन आणि जनता यांच्यातील विश्वास हीच लोकशाहीची खरी ताकद असल्याचे त्यांनी नमूद केले.*
*यावेळी नगराध्यक्षांनी सर्व उपस्थित नागरिकांचे, अधिकारी-कर्मचाऱ्यांचे, शिक्षकांचे, विद्यार्थ्यांचे व कार्यक्रमाच्या यशस्वी आयोजनासाठी परिश्रम घेतलेल्या सर्वांचे मनःपूर्वक आभार मानले. मुख्याधिकारी सूर्यकांत पिंदुरकर यांनीही प्रजासत्ताक दिनाच्या शुभेच्छा देत नगर परिषदेमार्फत राबविण्यात येणाऱ्या विकासात्मक व लोकाभिमुख उपक्रमांची माहिती दिली*.
एकूणच हा प्रजासत्ताक दिनाचा सोहळा राष्ट्रीय एकात्मता, लोकशाही मूल्ये, सामाजिक सलोखा आणि संविधानाबद्दलचा अभिमान व्यक्त करणारा ठरला. गडचिरोली शहरात प्रजासत्ताक दिन मोठ्या उत्साहात, शिस्तबद्ध आणि प्रेरणादायी वातावरणात साजरा झाल्याचे चित्र यावेळी पाहायला मिळाले.
