गडचिरोली, (जिमाका) दि.07 :- राज्य निवडणूक आयोगाच्या दिनांक 24 नोव्हेंबर रोजीच्या आदेशान्वये गडचिरोली जिल्हयातील 9 नगरपंचायतीमधील सदस्य पदाच्या सार्वत्रिक निवडणुकीचा कार्यक्रम-2021 जाहिर करण्यात आला आहे. राज्य निवडणूक आयोगाने दिनांक 24 नोव्हेंबर 2021 रोजी जाहिर केलेल्या निवडणूक कार्यक्रमामध्ये नामनिर्देशनपत्रासोबत जातवैधता प्रमाणपत्र सादर करणे बंधनकारक असल्याचे कळविले आहे. राज्य निवडणूक आयोगाच्या दिनांक 6 डिसेंबर 2021 रोजीच्या पत्रान्वये आता शासनाने नगर विकास विभागाचा सन 2021 चा अध्यादेश क्रमांक 15, दिनांक 6 डिसेंबर 2021 नुसार नामनिर्देशनपत्रासोबत जातवैधता प्रमाणपत्र देण्यासाठी पडताळणी समितीकडे सादर केलेल्या अर्जाची सत्यप्रत किंवा पडताळणी समितीकडे अर्ज केला असल्याबाबतचा अन्य कोणताही पुरावा आणि निवडून आल्याच्या दिनांकापासून 12 महिण्यांच्या आत पडताळणी समितीने दिलेले वैधता प्रमाणपत्र सादर करील, असे हमीपत्र सादर करण्याची मुभा उमेदवारांना दिलेली आहे.
तसेच उमेदवारांना नामनिर्देशन दाखल करणे शक्य व्हावे हेतूने नामनिर्देशनपत्राचा कालावधी दिनांक 7 डिसेंबर 2021 रोजी संध्याकाळी 5 वाजेपर्यंत वाढविण्यात आले असून उमेदवारांना जातवैधता प्रमाणपत्र देण्यासाठी पडताळणी समितीकडे सादर केलेल्या अर्जाची सत्यप्रत किंवा पडताळणी समितीकडे अर्ज केला असल्याबाबतचा अन्य कोणताही पुरावा तसेच विहित नमुन्यातील हमीपत्र सादर करण्यास दिनांक 8 डिसेंबर 2021 रोजी दुपारी 12 वाजेपर्यंत मुदत देण्यात आलेली आहे. सर्व संबंधितानी याची नोंद घ्यावी असे जिल्हाधिकारी संजय मीणा यांनी केले आहे.
