गडचिरोली येथे जंबो कोविड सेंटर उभारा : डॉ देवराव होळी
मुख्यमंत्री उद्धवजी ठाकरेंना पत्राद्वारे केली मागणी
विरोधी पक्षनेते देवेंद्रजी फडणवीस व माजी कॅबिनेट मंत्री सुधीरभाऊ मुनगंटीवार यांनाही पाठविले पत्र.
आज आमदार डॉ देवराव होळी यांच्या पुढाकाराने जिल्हाधिकारी व मुख्य कार्यकारी अधिकारी यांच्या उपस्थितीत होणार बैठक
गडचिरोली :- मागील तीन ते चार दिवसांपासून गडचिरोली जिल्ह्यातील कोरोना रुग्णांची संख्या झपाट्याने वाढत आहे. गेले दोन दिवसांत नव्याने पोजीटीव्ह आलेल्या रूग्णांचा आकडा भयावह आहे जिल्ह्यातील सर्व तालुक्यात या आजाराने मृत्यूमुखी पडणाऱ्यांची संख्या देखील मोठी आहे. अशा परिस्थितीत जिल्हा सामान्य रुग्णालयात येथे कोरोना रुग्णांच्या उपचारासाठी मुबलक व्यवस्था उपलब्ध नाही. तालुक्यातील उपजिल्हा रुग्णालयात व्हेंटिलेटर्स सुद्धा उपलब्ध नाही.
या सर्व बाबी लक्षात घेत गडचिरोली येथे नगर परिषद व जिल्हा सामान्य रुग्णालय यांच्या संयुक्त विद्यमाने सर्व सोयीयुक्त जंबो कोविड सेंटर उभारण्याची मागणी गडचिरोली विधानसभेचे आमदार डॉ देवराव होळी यांनी यांनी राज्याच्या मुख्यमंत्र्यांकडे पत्राद्वारे केली आहे. या संदर्भात त्यांनी राज्याचे विरोधी पक्षनेते देवेंद्रजी फडणवीस व माजी अर्थ मंत्री सुधीरभाऊ मुनगंटीवार यांनाही पत्र दिले आहे.
सध्या गडचिरोली येथील जिल्हा सामान्य रुग्णालयात बेड मिळण्यासाठी वाट बघावी लागत आहे येणाऱ्या काळात परिस्थिती लक्षात घेऊन आताच गडचिरोली येथे जंबो कोविड सेंटर उभारणे आवश्यक आहे. गडचिरोली येथे जंबो कोविड सेंटर झाल्यास जिल्ह्यातील समस्त तालुक्यातील गंभीर रुग्णांना याचा फायदा होईल असे गडचिरोली विधानसभा मतदार संघाचे आमदार डॉ देवराव होळी यांनी सांगितले आहे.
